Wednesday, January 17, 2018

নতুন দিনপঞ্জী


আমাৰ ৰাজ্যখনৰ চৰকাৰী বিদ্যালয়সমূহ বহুদিনৰ পৰাই নানান সমস্যাৰে জৰ্জৰিত হৈ আছে। প্ৰাথমিক শিক্ষাখণ্ডত হোৱা দুৰৱস্থাৰ বাবে সাধাৰণ মানুহে চৰকাৰী বিদ্যালয়ৰ সলনি ব্যক্তিগত খণ্ডৰ বিদ্যালয়লৈ ঢাপলি মেলিছিল। কেইবাখনো চৰকাৰী বিদ্যালয় বন্ধ কৰি দিবলগীয়া হৈছিল। কিন্তু বৰ্তমান চৰকাৰে গুণোত্সৱৰ যোগেদি বিদ্যালয়সমূহৰ শিক্ষাৰ মানৰ ব্যাপক পৰিৱৰ্তনৰ আশা দেখুৱাইছে। গুণোত্সৱে বহুতো চৰকাৰী বিদ্যালয় আকৰ্ষণীয়কৈ সজাই পৰাই তুলিছে। গুণোত্সৱৰ সময়ত মন্ত্ৰী, বিধায়ক, জ্যেষ্ঠ আমোলাৰ বিদ্যালয়বোৰত পদাৰ্পনে ছাত্ৰ-ছাত্ৰী আৰু শিক্ষকক উত্সাহিত কৰিছে আৰু চৰকাৰী বিদ্যালয়সমূহৰ প্ৰতি মানুহৰ আগ্ৰহ বৃদ্ধি কৰিছে।

শেহতীয়াকৈ শিক্ষা বিভাগে বিদ্যালয়বোৰৰ শৈক্ষিক দিনপঞ্জী খনক নতুন ৰূপত সজাই এক প্ৰশংসনীয় কাম কৰিছে। নিম্ন আৰু উচ্চ প্ৰাথমিকৰ বাবে ৰাজ্যিক শিক্ষা গৱেষণা আৰু প্ৰশিক্ষণ পৰিষদে, মাধ্যমিক স্তৰৰ বাবে মাধ্যমিক শিক্ষা পৰিষদে আৰু উচ্চতৰ মাধ্যমিকৰ বাবে উচ্চতৰ মাধ্যমিক শিক্ষা সংসদে এই শিক্ষা দিনপঞ্জী তৈয়াৰ কৰিছে। তাত্পৰ্যপূৰ্ণভাৱে নিম্ন প্ৰাথমিক শ্ৰেণীৰ পৰা উচ্চতৰ মাধ্যমিক শ্ৰেণীলৈ সকলোৰে শ্ৰেণী আৰম্ভ হোৱা সময় ৰাতিপুৱা ৯-৩০ কৰা হৈছে। সকলো শ্ৰেণীৰ বাবে দিনটোত বিৰতিৰ সময় এটাৰ ঠাইত দুটা কৰাটো এটা নতুন সংযোজন। শৈক্ষিক দিনপঞ্জীখন পূৰ্বৰ দৰে কিতাপৰ নিচিনা নকৰি কেলেণ্ডাৰৰ আৰ্হিত তৈয়াৰ কৰি উলিওৱা হৈছে যাতে ছাত্ৰ শিক্ষকৰ চকুত পৰাকৈ দিনপঞ্জীখন শ্ৰেণীকোঠাত আঁৰি থব পৰা হয়। মন কৰিবলগীয়াযেএই নতুন দিনপঞ্জীত বিদ্যালয়বোৰত পালন কৰিবলগীয়া বিভিন্ন দিৱসৰ কথাও উল্লেখ কৰা আছে। অতিৰিক্ত ভাৱে বিদ্যালয় সমূহত ধূমপান বিৰোধী দিৱস, মেলেৰিয়া প্ৰতিৰোধ দিৱস আদি উদযাপন কৰিবলৈ নিৰ্দেশ দিয়া হৈছে যাতে ছাত্ৰ ছাত্ৰীসকল এইবোৰ বিষয়ত সচেতন হয়। তদুপৰি ছাত্ৰ – ছাত্ৰীসকলক স্বচ্ছতাৰ প্ৰতি সজাগতা, জ্যেষ্ঠ সকলৰ প্ৰতি সন্মান, নিচাযুক্ত সামগ্ৰীৰ ভয়বহতা আদিৰ ওপৰত সচেতন কৰিবলৈ বিদ্যালয় কৰ্তৃপক্ষক নিৰ্দেশ দিয়া হৈছে। আনকি ছাত্ৰ ছাত্ৰীসকলে গৰমৰ বন্ধ, পূজাৰ বন্ধ আদিত কৰিবলগীয়া কামৰ বিষয়েও দিনপঞ্জীত উল্লেখ কৰা আছে। ব্যক্তিগত খণ্ডৰ বিদ্যালয়ৰ আৰ্হিত ছাত্ৰ ছাত্ৰীসকলৰ বাবে সময়ে সময়ে পৰীক্ষা পাতিবলৈও পৰামৰ্শ দিয়া হৈছে।


চৰকাৰী খণ্ডৰ বিদ্যালয় সমূহক ব্যক্তিগত খণ্ডৰ বিদ্যালয়ৰ আৰ্হিত গঢ়ি তুলিবলৈ শিক্ষা বিভাগে লোৱা এই পদক্ষেপ নি:সন্দেহে অতি আদৰণীয়। চৰকাৰে অসমৰ চৰকাৰী শিক্ষা ব্যৱস্থাৰ সংস্কাৰৰ বাবে লোৱা এই ব্যৱস্থাসমূহে চৰকাৰী বিদ্যালয়সমূহক উজ্জীৱিত কৰি তুলিব।এইবছৰ বছৰৰ আৰম্ভণিতে বিনামূলীয়া পাঠ্যপুথি ছাত্ৰ ছাত্ৰীসকলৰ হাতত পৰাটো শলাগিবলগীয়া। কিন্তু কেৱল গুণোত্সৱ উদযাপন আৰু শিক্ষা দিনপঞ্জী প্ৰস্তুত কৰাতেই চৰকাৰৰ দায়িত্ব শেষ নহয়। চৰকাৰী বিদ্যালয়সমূহত আন্ত:গাঁঠনিৰ উন্নয়ন, উপযুক্ত শিক্ষকৰ নিযুক্তি আদিৰ ওপৰতো চৰকাৰে সমানেই গুৰুত্ব দিব লাগিব। চৰকাৰী বিদ্যালয়ৰ উন্নতি হ’লে অসমীয়া মাধ্যমৰ বিদ্যালয়সমূহো ঠন ধৰি উঠিব। চৰকাৰী বিদ্যালয়ৰ দুৰৱস্থাৰ বাবে ব্যক্তিগত খণ্ডৰ বিদ্যালয় আৰু ইংৰাজী মাধ্যমৰ পিনে ধাৱমান হ’বলৈ ধৰা অভিভাৱকে পুনৰ চৰকাৰী বিদ্যালয়ত নিজৰ সন্তানক ভৰ্তি কৰোৱা আৰম্ভ কৰিলে সেয়া হ’ব এই পৰিৱৰ্তনৰ বৃহসফলতা। তেনে হ’বলৈ হ’লে মন্ত্ৰী-বিধায়ক, চৰকাৰী বিষয়া কৰ্মচাৰী সকলেও নিজৰ সন্তানক চৰকাৰী বিদ্যালয়ত পঢ়ুৱাই আদৰ্শ ডাঙি ধৰিব লাগিব। শিক্ষা বিভাগৰ সংস্কাৰৰ বাবে বিভিন্ন বৈপ্লৱিক পৰিবৰ্তনৰ সূচনা কৰা শিক্ষামন্ত্ৰীয়ে চৰকাৰী বিষয়া কৰ্মচাৰীৰ সন্তানক চৰকাৰী বিদ্যালয়ত পঢ়ুৱাবলৈ আকৰ্ষিত কৰাব পাৰিবনে? 

হজযাত্ৰীৰ ৰাজসাহাৰ্য কৰ্তন


প্ৰতিবছৰে ভাৰতৰ পৰা বহুসংখ্যক মুছলমান লোকে ছৌডি আৰৱৰ মক্কালৈ হজ কৰিবলৈ যায়। ব্ৰিটিছৰ ৰাজত্বৰ সময়ৰে পৰা ভাৰতৰ পৰা হজলৈ তীৰ্থযাত্ৰা কৰিবলৈ যোৱা মুছলমানসকলক আৰ্থিকভাৱে সকাহ দিবলৈ ৰাজসাহাৰ্য দি অহা হৈছে। চৰকাৰে আগবঢ়োৱা এই বিশেষ সুবিধাৰ বাবে হজযাত্ৰীসকলে এয়াৰ ইণ্ডিয়াৰ বিমানত ৰেহাই মূল্যত যাবলৈ পায়। ৰেহাই মূল্যৰ বিমানযাত্ৰাৰ উপৰিও হজযাত্ৰীসকলে বিমানকোঠৰ আগমণ আৰু প্ৰস্থান কক্ষত বিশেষ সুবিধা লাভ কৰে। তদুপৰি হজ যাত্ৰীসকলৰ থকা-খোৱা, খাদ্য আৰু চিকিত্সা আদিতো চৰকাৰৰ পিনৰ পৰা বিশেষ অনুগ্ৰহ লাভ কৰি আহিছে। কিন্তু শেহতীয়াকৈ ভাৰত চৰকাৰৰ সংখ্যালঘু কল্যাণ মন্ত্ৰণালয়ে ঘোষণা কৰিছেযে চলিত বছৰৰ পৰা  হজ যাত্ৰীসকলে লাভ কৰা ৰাজসাহাৰ্যৰ কৰ্তন কৰা হ’ব।

চৰকাৰে ৰাজসাহাৰ্য কৰ্তন কৰিবলৈ লোৱা সিদ্ধান্তই যথেষ্ট প্ৰতিক্ৰিয়াৰ সৃষ্টি কৰিছে। কেন্দ্ৰত শাসনাধিস্থ হিন্দুত্ববাদী চৰকাৰৰ এই কাৰ্য সংখ্যালঘুসকলক প্ৰাপ্য অধিকাৰৰ পৰা বঞ্চিত কৰাৰ নিকৃষ্ট ষড়যন্ত্ৰ বুলিও চৰ্চিত হৈছে। কিন্তু মনকৰিবলগীয়াযে ২০১২ চনতে উচ্চতম ন্যায়ালয়ৰ ন্যায়াধীশ আফতাব আলমৰ বিচাৰপীঠে ২০২২ চনৰ ভিতৰত হজ যাত্ৰীসকলে লাভ কৰা ৰাজসাহাৰ্য বিলোপ কৰিবলৈ চৰকাৰলৈ নিৰ্দেশনা জাৰী কৰিছিল। লগতে উচ্চতম ন্যায়ালয়ে পৰামৰ্শ আগবঢ়াইছিলযে ৰাহি হোৱা ৰাজসাহাৰ্যৰ ধন চৰকাৰে সংখ্যালঘুসকলৰ উন্নয়নৰ বাবে খৰছ কৰিব লাগে। উচ্চতম ন্যায়ালয়ে বান্ধি দিয়া সময়সীমালৈ চাৰি বছৰ বাকী থকা সময়তে চৰকাৰে হজৰ ৰাজসাহাৰ্য কৰ্তন কৰাৰ সাহসী সিদ্ধান্ত ঘোষণা কৰিছে। চৰকাৰে ৰাজসাহাৰ্য কৰ্তনৰ যোগেদি ৰাহি হোৱা ৭০০ কোটি টকা পিছপৰা মুছলমান ছোৱালীৰ শিক্ষাৰ কাৰণে খৰছ কৰা হ’ব বুলিও ঘোষণা কৰিছে। সেইদৰে চৰকাৰে ছৌডি আৰৱ চৰকাৰৰ লগত আলোচনা কৰি ২০১৮ চনত ভাৰতৰ পৰা যোৱা হজযাত্ৰীৰ সংখ্যা বৃদ্ধি কৰি অভিলেখ সংখ্যক ১ লাখ ৭৫ হাজাৰ তীৰ্থযাত্ৰীক হজলৈ পঠিওৱাৰ দিহা কৰিছে। সেইদৰে হজলৈ ওলোৱা মহিলাৰ বাবে এজন পুৰুষ সংগী থকাৰ বাধ্যবাধকতা আৰু শাৰীৰিক বিসংগতি থকা লোকৰ হজলৈ যোৱাত বাধা বিলোপ কৰাৰ কথা ঘোষণা কৰিছে। মন কৰিবলগীয়াযে ২০১৮ চনত হজলৈ যাবলৈ আবেদন কৰা ১৩০০ মহিলাৰ সকলো আবেদন মঞ্জুৰ কৰা হৈছে।

উল্লেখ্যযে, বিশ্বৰ মুছলমান প্ৰধান ৰাষ্ট্ৰসমূহতো  হজযাত্ৰীসকলৰ বাবে কোনো ৰাজসাহাৰ্য আগবঢ়োৱা নহয়। উচ্চতম ন্যায়ালয়ৰ ২০১২ চনৰ ৰায়টোত উল্লেখ কৰা হৈছেযে মুছলমানসকলৰ ধৰ্মগ্ৰন্থ পৱিত্ৰ কোৰাণতো ৰাজসাহাৰ্যৰ কোনো নিৰ্দেশ নাই। ভাৰতত কেৱল ৰাজনৈতিক কাৰণত মুছলমান সকলৰ তুষ্টিকৰণৰ বাবেই হয়তো ব্ৰিটিছ আমোলতে আৰম্ভ হোৱা হজযাত্ৰীক ৰাজসাহাৰ্য প্ৰদানৰ ব্যৱস্থা চলি আহিছে। উচ্চতম ন্যায়ালয়ে সেইবাবেই হজযাত্ৰীক ৰাজসাহাৰ্য দিয়াৰ পৰিৱৰ্তে সেই ধন সংখ্যালঘুসকলৰ সামগ্ৰিক উন্নয়নৰ বাবে খৰছ কৰিবলৈ পৰামৰ্শ দিছে । আন এটা মহলৰ মতে হজযাত্ৰীৰ ৰাজসাহাৰ্যৰ বাবে খৰছ কৰা ধনে হজযাত্ৰীসকলতকৈ বিমান পৰিবহন সংস্থা এয়াৰ ইণ্ডিয়াকহে অধিক লাভবান কৰে। ৰাজসাহাৰ্য কৰ্তনৰ ফলত আৰ্থিকভাৱে জুৰুলা লোকসকলে হজযাত্ৰাৰ সুবিধা হেৰুৱাবলগীয়া হ’ব বুলিও আলোচনা হৈছে। কিন্তু চৰকাৰে দুখীয়া যাত্ৰীসকলৰ বাবে পানী জাহাজেৰে কম খৰছত হজযাত্ৰাৰ ব্যৱস্থা কৰা হ’ব বুলি ঘোষণা কৰিছে।


হজযাত্ৰাৰ ৰাজসাহাৰ্য কৰ্তন কেন্দ্ৰীয় চৰকাৰৰ এটা যুগান্তকাৰী সিদ্ধান্ত। কিন্তু এয়া কেৱল এক ৰাজনৈতিক সিদ্ধান্ত হোৱাটো অনুচিত। ৰাজসাহাৰ্য কৰ্তনৰ ফলত ৰাহি হোৱা ধন সংখ্যালঘুসকলৰ উন্নয়নৰ বাবে, বিশেষকৈ চৰকাৰে ঘোষণা কৰাৰ দৰে মুছলমান ছোৱালীৰ শিক্ষাৰ বাবে খৰছ হোৱাটো বাঞ্ছনীয়। তেনে হ’লেহে হজৰ ৰাজসাহাৰ্য কৰ্তন চৰকাৰৰ এক সঠিক সিদ্ধান্ত বুলি ক’ব পৰা যাব। 

Monday, January 8, 2018

ম’বাইল আসক্তি: এক ভয়াবহ মানসিক ব্যাধি


এজন ১৫ বছৰীয়া কিশোৰৰ পিতৃ হিচাপে মোৰ সন্মুখত প্ৰত্যাহ্বান হিচাপে দেখা দিয়া এটা সমস্যা হ’ল আমাৰ ল’ৰাটোৰ ম’বাইল গেমৰ প্ৰতি থকা অত্যাধিক আসক্তি। সি তাৰ সকলো আজৰি সময় মোবাইল ফোনত থকা গেম খেলিয়েই পাৰ কৰিব খোজে। নিচাৰ দৰে হৈ পৰা ম’বাইল গেমৰ আসক্তিয়ে তাৰ বাহিৰা কিতাপ পঢ়া, গান শুনা, ছবি অঁকা, তবলা বজোৱা আদি আন আজৰি পৰৰ চখবোৰৰ কাৰণে সময় নাইকীয়া কৰিছে। গেম খেলাৰ কাৰণে নিৰ্দিষ্ট সময় ধাৰ্য কৰি দিয়াৰ পাছতো সেই সীমা প্ৰায় প্ৰতিদিনেই অতিক্ৰম কৰে। দিনে নিশাই কেৱল খেলৰ কথাই চিন্তা কৰি থকা ল’ৰাটোৱে আন সকলো কামৰ প্ৰতি স্পৃহা হেৰুৱাইছে, পঢ়া শুনাত অন্যমনস্ক হৈ পৰিছে, নতুন কথা শিকাৰ ধাউতি নাইকীয়া হৈছেসময়মতে গেম খেলিবলৈ নাপালে সি চটফটাই থাকে, খিংখিঙীয়া হৈ পৰে আৰু হতাশাত ভোগে।  
মোৰ বোধেৰে আজিৰ সময়ত কিশোৰ কিশোৰীৰ পিতৃ মাতৃ আৰু অভিভাৱকসকলৰ বহুতেই একে ধৰণৰ সমস্যাৰ সন্মুখীন হয়কৈশোৰৰ সময়খিনি এনেয়ো অতি সংবেদনশীল সময়, যিসময়ত বয়:সন্ধিৰ বাবে দেহত হৰমোনৰ হীন দেঢ়ি হয়, ল’ৰা ছোৱালীহঁতে শৈশৱৰ পৰা যৌৱনলৈ গতি কৰে। এই সময়খিনিয়েই আকৌ প্ৰাণ প্ৰাচুৰ্যৰে ভৰা সময়, জীৱনটোৰ লগত পৰীক্ষা নিৰীক্ষা কৰাৰ সময় আৰু ভৱিষ্যতৰ বাবে সাজু হোৱাৰ সময়। সেয়েহে জীৱনৰ এই সোণালী সময়খিনি মোবাইল গেমৰ আসক্তিয়ে কাঢ়ি নিয়াটো কেতিয়াও গ্ৰহণযোগ্য হ’ব নোৱাৰে। কিন্তু আজিৰ সময়ত ল’ৰা ছোৱালীক বিশ্বায়ন আৰু বিজ্ঞান প্ৰযুক্তিয়ে আনি দিয়া এই নতুন আসক্তিৰ পৰা সম্পূৰ্ণকৈ পৃথক কৰিও ৰাখিব নোৱাৰি। ইণ্টাৰনেট, প্ৰচাৰ মাধ্যম আৰু সমনীয়াসকলৰ পৰা সিহঁতে এই গেমবোৰৰ বিষয়ে সকলো কথাই জানি বুজি লয়, সেইবোৰ খেলাৰ নিজেই ব্যৱস্থা কৰি লয়পিতৃ মাতৃৰ অজ্ঞাতসাৰেই ঘৰত থকা ম’বাইল ফোনটোৰ জৰিয়তেই তেওঁলোকে ডিজিটেল গেমৰ শিহঁৰণকাৰী আৰু ৰোমাঞ্চকৰ পৃথিৱীত প্ৰৱেশ কৰে।
ম’বাইল আৰু ভিডিঅ’ গেম এতিয়া বিশ্বত কেইবা লাখ কোটি টকীয়া ব্যৱসায় হৈ পৰিছে। মানুহক সাময়িক আনন্দ আৰু মনোৰঞ্জন দিবলৈ সৃষ্টি কৰা হৈছে নতুন নতুন গেমৰ। বিজ্ঞান আৰু প্ৰযুক্তিৰ বিকাশৰ লগে লগে ম’বাইল গেমতো নতুন নতুন কাৰিকৰী সংযোজন ঘটিছে। ইণ্টাৰনেটৰ যোগেদি খেলুৱৈ সকলক সংযোজিত কৰি প্ৰতিযোগিতামূলক আৰু মাদকতাভৰা খেল তৈয়াৰ কৰা হৈছে। খেলুৱৈৰ বয়স, অভিজ্ঞতা আৰু অৱস্থান অনুসৰি খেলৰ প্ৰকৃতিও সলনি কৰা হয়। এনে খেলবোৰে কেৱল কিশোৰ কিশোৰীকে আকৃষ্ট কৰা নাই, সকলো বয়সৰ মানুহৰে ম’বাইল গেম খেলাটো আজৰি পৰৰ চখ হৈ পৰিছে। এতিয়া বিয়াই সবাহে প্ৰায় মানুহে আনৰ লগত কথা বতৰা পতাৰ সলনি নিজৰ নিজৰ ম’বাইল ফোনত ব্যস্ত হৈ থকাহে দেখা যায়। আনকি বিধানসভাতো বিধায়কে ম’বাইলত গেম খেলি থকাটো ধৰা পৰিছিল।
মহাভাৰতত আছেযে, পাশাখেলৰ নিচাত পৰি যুধিস্থিৰে নিজৰ ৰাজ্য, সম্পত্তি, ভায়েক কেইজন আনকি পত্নী দ্ৰৌপদীকো হেৰুৱাবলগীয়া হৈছিল। সেইদৰেই আজিৰ সময়ত ম’বাইল আৰু ভিডিঅ’ গেমৰ কবলত পৰি নৱ প্ৰজন্মই হেৰুৱাইছে তেওঁলোকৰ প্ৰতিভা, জ্ঞানস্পৃহা আৰু পৰিশ্ৰম কৰাৰ মানসিকতা। ইণ্টাৰনেটে আনি দিয়া ফে’চবুক, হোৱাটচেপ আদি আন আন আসক্তিবোৰেও মানুহক নিমজ্জিত কৰিছে এখন ৰূপকল্পৰ জগতত, যিখন জগতত মনোৰঞ্জনৰ প্ৰতি থকা মানুহৰ স্বাভাৱিক আসক্তি আৰু মানুহৰ হাতত থকা আজৰি সময় ব্যৱহৃত হৈছে ব্যৱসায়িক কাৰণত। ম’বাইলৰ প্ৰতি বৰ্দ্ধিত আসক্তিয়ে এতিয়া এনে ৰূপ লৈছেযে ম’বাইলৰ কাৰণেই সংঘটিত হৈছে চুৰি, ডকাইতি আনকি হত্যাৰ দৰে জঘন্য অপৰাধ।
২০১৮ চনৰ নতুন বছৰত বিশ্ব স্বাস্থ্য সংস্থাই বিশ্বৰ যিবোৰ মাৰাত্মক ব্যাধিৰ নামৰ তালিকা প্ৰকাশ কৰিছে, সেইবোৰৰ ভিতৰত মানসিক ব্যাধি হিচাপে কৰিছে ভিডিঅ’ গেমৰ নিচাই। বিশ্ব স্বাস্থ্য সংস্থাৰ মতে যেতিয়া কোনো এজন ব্যক্তিৰ মন আৰু হৃদয় কেৱল গেমৰ নিচাই আৱৰি থাকে, বাৰে বাৰে গেম খেলিবলৈ মন আকৃষ্ট হয়, তেওঁ আন একো কথা চিন্তা কৰিব নোৱৰা হয়, তেওঁৰ আন কোনো কামতে মন নবহা হয় আৰু এনে অৱস্থা যদি এবছৰ বা ততোধিক সময় বাহাল থাকে, তেতিয়া এনে অৱস্থাক এক মানসিক ব্যাধি হিচাপে পৰিগণিত কৰিব পাৰি ২০১৩ চনৰ পৰাই চিকিত্সা বিজ্ঞানীসকলৰ মাজত চৰ্চা লাভ কৰা এটা বিষয় আছিল, ভিডিঅ’ গেমৰ নিচাক মানসিক ব্যাধি বুলি পৰিগণিত কৰিব পৰা যায় নে নাই। যিহেতু ম’বাইল বা ভিডিঅ’ গেমৰ আসক্তিক পোনপেটীয়াকৈ এক ব্যাধি বা disorder বুলি কব নোৱাৰি, সেয়েহে এই বিষয়ত যথেষ্ট গৱেষণা আৰু অধ্যয়ন কৰাৰ পাছত বিশ্ব স্বাস্থ্য সংস্থাই অৱশেষত এই আসক্তিক এক মানসিক ৰোগ হিচাপে স্বীকৃতি দিবলৈ সিদ্ধান্ত কৰিছে।  
ASSOCHAM নামৰ সংস্থাটোৱে ২০১১ চনত দিল্লী, মুম্বাই, জয়পুৰ আৰু পাটনাত চলোৱা এটা সমীক্ষাৰ পৰা জানিব পৰাগৈছেযে এই চহৰকেইখনত বাস কৰা ৮২% স্কুলীয়া ল’ৰা ছোৱালীয়ে সপ্তাহত ১৬ ৰ পৰা ১৮ ঘণ্টা ভিডিঅ’ গেম খেলে। অৰ্থাৎ দৈনিক গড়ে দুঘণ্টাতকৈও অধিক সময় গেমৰ মাজেৰে অতিবাহিত কৰে।  এই সমীক্ষাটোতে প্ৰকাশ পাইছেযে ৭৬% ল’ৰা ছোৱালীয়ে Action Game বা দ্ৰুতগতিত চলা গেমবোৰ ভাল পায়। মনকৰিবলগীয়াযে এই Action game বোৰৰ সৰহভাগতে বন্দুকেৰে গুলী মাৰিবলৈ, হিংসাত্মক কাৰ্য কৰিবলৈ আনকি শত্ৰুপক্ষক নৃসংসভাৱে হত্যা কৰিবলৈ নিৰ্দেশ দিয়া হয়, যিবোৰে কোমল বয়সীয়া ল’ৰা ছোৱালীৰ মানসিকতাক প্ৰভাৱান্বিত কৰে। সেইকাৰনেই হয়তো স্কুলীয়া ল’ৰা ছোৱালীৰ মাজত অপৰাধপ্ৰৱণতা ভয়ংকৰভাৱে বৃদ্ধি পাইছে। সৌ সিদিনা গুৰগাঁৱৰ ৰায়ান ইণ্টাৰনেশ্যনেল স্কুলত এজন সাত বছৰীয়া ছাত্ৰক তেওঁৰ জ্যেষ্ঠ সহপাঠীয়ে ডিঙি ৰেপি হত্যা কৰাৰ চাঞ্চল্যকৰ ঘটনা সংঘটিত হৈছে। মোৰ মনত আছে এবাৰ গাড়ীৰে গৈ থাকোঁতে চকুৰ আগতে হোৱা পথ দুৰ্ঘটনা এটাত মানুহ এজন মৰি যোৱা দেখি মোৰ ল’ৰাটোৱে কৈছিল,“এইটোনো কি এক্সিডেণ্ট, ভিডিঅ’ গেমত কিমান ডাঙৰ ডাঙৰ এক্সিডেণ্ট হয় আৰু কিমান মানুহ মৰে”। এই ভিডিঅ’ গেমবোৰে আমাৰ উঠি অহা ল’ৰা ছোৱালীবোৰৰ কেনে মানসিকতা সৃষ্টি কৰিছে সেই কথা ভাবি সেইদিনা শিয়ঁৰি উঠিছিলোঁ।
ভিডিঅ’ গেমৰ প্ৰভাৱৰ ওপৰত চলোৱা কেইবাটাও অধ্যয়নত ধৰা পৰিছেযে, অতিমাত্ৰা ভিডিঅ’ গেম খেলাৰ ফলত মানসিক হেঁচা আৰু হতাশগ্ৰস্থতাৰ দৰে সমস্যাৰ সৃষ্টি হয়। Attention deficit hyperactivity disorder (ADHD) আৰু Obsessive-compulsive disorderৰ দৰে মানসিক ৰোগৰ কাৰণো অত্যাধিক ভিডিঅ’ গেমৰ প্ৰতি আসক্তিও হ’ব পাৰে বুলি প্ৰতিপন্ন হৈছে। যিকোনো নিচাসক্ত মানুহৰ দৰে গেমত আসক্ত সকলৰ আন সকলো বিষয়তে মনোযোগিতাৰ অভাৱ হয়। তেওঁলোকে নতুন কাম নিশিকি একেবোৰ কাম কৰি ভাল পায়। ভিডিঅ’ গেমৰ কাল্পনিক জগতত প্ৰত্যাহ্বানবোৰ নেওচি লাভ কৰা বিজয়ী বা হিৰো হোৱাৰ মাদকতা বাস্তৱ জীৱনত বিচাৰি নোপোৱা বাবে ভিডিঅ’ গেম খেলা বহুতো ল’ৰা ছোৱালী মানসিকভাৱে অস্থিৰ হৈ পৰে। আজিৰ সময়ত ভিডিঅ’ গেমত প্ৰৱেশ ঘটিছে ছিগাৰেট সেৱন, সুৰাপান, যৌনাচাৰ আদিৰ দৰে প্ৰাপ্তবয়স্ক লোকৰ উপাদানসমূহৰ, যিবোৰে কোমল বয়সতে ল’ৰা ছোৱালীক নিজে গম নোপোৱাকৈয়ে প্ৰাপ্ত বয়স্কৰ জগতখনৰ লগত চিনাকী কৰি দিয়ে। মানসিকভাৱে দুৰ্বল হোৱাৰ বাবে এনে ল’ৰা ছোৱালীয়ে কোমল বয়সতে আন নিচাৰ প্ৰতিও আসক্ত হৈ পৰে।
সকলো বস্তুৰে ভাল আৰু বেয়া দুয়োটা দিশ থাকে। ম’বাইল বা ভিডিঅ’ গেমৰো নিশ্চয় কিছুমান ইতিবাচক প্ৰভাৱ আছে। এই গেমসমূহে ল’ৰা ছোৱালীক প্ৰত্যাহ্বান গ্ৰহণ কৰি যুঁজাৰু মানসিকতাৰে বিজয়ী হোৱাৰ লক্ষৰে আগবাঢ়িবলৈ শিকনি দিয়ে। কিছুমান মনোবৈজ্ঞানিকে এইবুলিও মতপোষণ কৰেযে ভিডিঅ’ গেম খেলা ল’ৰা ছোৱালীৰ বাস্তৱ জীৱনত ক্ষিপ্ৰ সিদ্ধান্ত লোৱাৰ ক্ষমতা বিকশিত হয় আৰু তেওঁলোকৰ প্ৰতিক্ৰিয়া সমূহ খৰতকীয়া হয়। কিন্তু এই সুফলসমূহ লাভ কৰা তেতিয়াহে সম্ভৱ হয়, যেতিয়া ভিডিঅ’ গেম নিচালৈ পৰিৱৰ্তিত নহয় আৰু নিৰ্দিষ্ট সময়সীমাৰ ভিতৰতে ভিডিঅ’ গেম সীমিত ৰখা হয়। আনহাতে বিভিন্ন অধ্যয়নৰ যোগেদি জানিব পৰা গৈছেযে অধিক সময় ভিডিঅ’ গেম খেলা ল’ৰা ছোৱালীৰ টোপনি কম হয়, খোৱা-বোৱা কমি যায়, মানুহৰ লগত মিলা মিচা কৰিবলৈ মন নোযোৱা হয়। ভিডিঅ’ গেমৰ নিচাত বুৰ যোৱা ল’ৰা ছোৱালীয়ে ফুৰা চকাতো কোনো আনন্দ নাপায়। অৱসৰ বিনোদনৰ কাৰণে কোনো পৰ্যটন স্থানলৈ গ’লেও তাত তেওঁলোকে কোনো আগ্ৰহ নাপায়। ভিডিঅ’ গেমৰ নিচাত ডুব গৈ থকাটোৱেই তেওঁলোকৰ একমাত্ৰ আনন্দৰ কাৰণ হৈ পৰে। নিউ মেক্সিকো বিশ্ববিদ্যালয়ৰ এক অধ্যয়নৰ পৰা জানিব পৰা গৈছে যে ভিডিঅ’ গেম খেলা  ১৫% ৰ পৰা ২০% ল’ৰা – ছোৱালীয়ে এই নিচাৰ চিকাৰ হয়। এনে ল’ৰা ছোৱালীবোৰৰ কিছুমান শাৰীৰিক আৰু মানসিক লক্ষণে দেখা দিয়ে। তেওঁলোকে বাস্তৱ জীৱনৰ পৰা পলায়নবাদী হৈ পৰে। গেম খেলিবলৈ নাপালে চৰম অশান্তিত ভোগাৰ লগতে খং আৰু হতাশাত ভোগে। তেওঁলোকে মানুহৰ লগত মিলা মিচা নকৰে, দ্বায়িত্বশীল নহয়, স্কুলৰ ঘৰুৱা কামবোৰ ভালদৰে নকৰে, স্কুল ক্ষতি কৰিও গেম খেলিব খোজে।
আজিকালি সৰুৰে পৰা পিতৃ মাতৃয়ে সন্তানৰ হাতত তুলি দিয়ে ম’বাইল ফোন, টেবলেট আৰু কম্পিউটাৰ। একেবাৰে সৰু কেঁচুৱায়ো মোবাইল ফোনৰ পৰ্দাত ভাঁহি অহা ৰং বিৰঙৰ দৃশ্য দেখি কান্দিবলৈ পাহৰি যায়। সেয়েহে ম’বাইল ফোন এতিয়া কেঁচুৱা নিচুকোৱাৰ সাধন হৈ পৰিছে। সৰুৰে পৰা ম’বাইল ফোন হৈ পৰিছে জীৱন যাত্ৰাৰ অবিচ্ছেদ্য অংগ। ম’বাইলৰ গেমত ল’ৰা ছোৱালীক ব্যস্ত ৰাখি মাক দেউতাকে নিজৰ বাবে আজৰি সময় উলিয়াই লয়। গেমত ব্যস্ত হৈ থকা ল’ৰা ছোৱালীক খুৱাবলৈ সুবিধা হয়, কাৰণ তেওঁলোকে কি খাইছে, সোৱাদ কেনে পাইছে একো ধৰিব নোৱৰা হয়। গেম খেলিবলৈ লোৱাৰ আগতেই ল’ৰা ছোৱালীয়ে গান শুনি, ভিডিঅ’ চাই ম’বাইল ফোন বা কম্পিউটাৰৰ লগত অভ্যস্ত হৈ পৰে। কেৱল উঠি অহা ল’ৰা ছোৱালীয়েই নহয়, আমি পিতৃ-মাতৃ, অভিভাৱকসকলেও ম’বাইল ফোন নোহোৱাকৈ এক্ষন্তেকো থাকিব নোৱৰা হৈছোঁ। আজিকালি আমাৰ দৈনিক জীৱন যাত্ৰাৰ বহুতো কাম, অফিছৰ কাম-কাজ ম’বাইল ফোনটোৰ জৰিয়তেই হয়। আমিও আজৰি সময় কটাবলৈ কিতাপ এখনৰ সলনি ম’বাইল ফোনটোকে তুলি লওঁ। এনে পৰিস্থিতিত ম’বাইল গেম বা ভিডিঅ’ গেমৰ বৰ্দ্ধিত আসক্তিৰ কাৰণে কেৱল কিশোৰ কিশোৰীকে দোষাৰোপ কৰিলে নহ’ব। তেওঁলোকক এই বাট আমিয়েই কিছু পৰিমাণে দেখুৱাইছোঁ।

আজিৰ সময়ত কিশোৰ কিশোৰীৰ মাজত বাঢ়ি অহা ম’বাইল ফোনৰ আসক্তি নিয়ন্ত্ৰিত কৰাটো সহজ নহয়। বিশ্ব স্বাস্থ্য সংখ্যাই মানসিক ব্যাধি হিচাপে স্বীকৃতি দিলেও এই ব্যাধিৰ নিৰাময়ৰ বাবে চিকিত্সাতকৈও সু পৰামৰ্শৰ (Counselling) প্ৰয়োজনহে অধিকবহুতো ল’ৰা ছোৱালীয়ে জীৱনত কোনো লক্ষ বান্ধি নোলোৱাকৈ গতানুগতিকভাৱে ছাত্ৰ জীৱন অতিবাহিত কৰে। পিতৃ মাতৃয়ে ল’ৰা ছোৱালীৰ লগত আলোচনা নকৰাকৈয়ে সিহঁতৰ ভৱিষ্যতৰ লক্ষ নিৰ্ধাৰণ কৰাৰো উদাহৰণ আছে। সেইকাৰণেই ল’ৰা ছোৱালীক ইঞ্জিনিয়াৰ বা ডাক্তৰ কৰাৰ সপোন দেখা পিতৃ মাতৃৰ সংখ্যাই অধিক। কিন্তু নিজেই লক্ষত উপনীত হোৱাৰ সপোন নেদেখা ল’ৰা ছোৱালীয়ে অতি সহজেই মনোৰঞ্জনকাৰী বিভিন্ন নিচাৰ প্ৰতি আকৰ্ষিত হয়। সেয়েহে সৰুৰে পৰা প্ৰতিটো ল’ৰা ছোৱালীৰ বাবে সিহঁতৰ ৰুচি আৰু আগ্ৰহ অনুসৰি জীৱনৰ এটা উদ্দেশ্য আৰু লক্ষ ঠিৰাং কৰিবলৈ পিতৃ মাতৃ আৰু অভিভাৱক যত্নপৰ হ’ব লাগে। এই ক্ষেত্ৰত অভিজ্ঞ আৰু প্ৰশিক্ষিত পৰামৰ্শদাতাৰ সহায়ো ল’ব পাৰি। তেনে লক্ষ স্থিৰ কৰি লোৱা ল’ৰা ছোৱালীয়ে ম’বাইল গেম মাজে সময়ে খেলিলেও আসক্ত হৈ নপৰে। কিন্তু সন্তানক ম’বাইল আসক্তিৰ পৰা ৰক্ষা কৰিবলৈ আটাইতকৈ প্ৰয়োজনীয় কথাটো হ’ল, আমি পিতৃ মাতৃ আৰু অভিভাৱকে নিজেই আগতে এই আসক্তিৰ পৰা মুক্ত হ’ব লাগিব। ল’ৰা ছোৱালীৰ লগত কটোৱা সময়খিনিত ম’বাইল ফোনৰ ব্যৱহাৰ যিমানদূৰ সম্ভৱ কম কৰিব লাগিব। আজৰি সময়ত টেলিভিছন চাই বা ম’বাইল খেল খেলি সময় পাৰ কৰাতকৈ ল’ৰা ছোৱালীক কোনো শাৰীৰিক পৰিশ্ৰমৰ খেল খেলিবলৈ বা নিজৰ হ’বি (Hobby) অনুসৰি বিভিন্ন সৃজনীমূলক কামত নিয়োজিত হ’বলৈ উত্সাহিত কৰিব লাগে। নেতিবাচক আসক্তিৰ পৰা ৰক্ষা পাবলৈ ইতিবাচক আসক্তিৰ আশ্ৰয় লোৱাৰ গত্যন্তৰ নাই।

Wednesday, January 3, 2018

অহেতুক হস্তক্ষেপ


অৱশেষত বহু উত্কণ্ঠা আৰু জল্পনা কল্পনাৰ ওৰ পেলাই যোৱা ৩১ ডিছেম্বৰৰ মাজনিশা, অৰ্থাৎ নতুন বছৰৰ প্ৰথম প্ৰহৰতে প্ৰকাশ পালে বহু প্ৰতীক্ষিত ৰাষ্ট্ৰীয় নাগৰিকপঞ্জীৰ প্ৰথম পৰ্যায়ৰ খছৰা। নাগৰিকপঞ্জী খছৰা প্ৰকাশৰ পাছত ৰাজ্যখনত আইন শৃংখলাজনিত পৰিস্থিতিৰ সৃষ্টি হ’ব বুলি সন্দেহ কৰা হৈছিল যদিও এতিয়ালৈ এই বিষয়ত কোনো ঠাইতে অপ্ৰীতিকৰ ঘটনা সংঘটিত হোৱা নাই। কিছুমানৰ নাম ৰাষ্ট্ৰীয় নাগৰিকপঞ্জীত সন্নিৱিষ্ট হৈছে আৰু কিছুমানৰ হোৱা নাই। কিন্তু তাকেলৈ ৰাজ্যখনৰ সাধাৰণ জনতাৰ মাজত কোনো লেখতলবলগীয়া উত্তেজনাৰ সূত্ৰপাত হোৱা নাই। নাম নথকা সকলেও আশা কৰিছেযে পৰৱৰ্তী পৰ্যায়ত প্ৰকাশ পাবলগীয়া তালিকাত তেওঁলোকৰ নামবোৰ সন্নিৱিষ্ট হ’ব।

উচ্চতম ন্যায়ালয়ৰ প্ৰত্যক্ষ তত্বাৱধানত চলি থকা ৰাষ্ট্ৰীয় নাগৰিকপঞ্জীৰ উন্নীতকৰণৰে ৰাজ্যখনৰ জ্বলন্ত বিদেশী সমস্যাটো ন্যায়সংগত ভাৱে সমাধান কৰাৰ বাট দেখুৱাব বুলি সকলোৱে আশা কৰিছে। কিন্তু এই বিষয়টোৱে বিভিন্ন সময়ত বিভিন্ন কাৰণত বিভ্ৰান্তিৰো সৃষ্টি কৰি আহিছে। কেইদিনমানৰ আগতে দিল্লীত অনুষ্ঠিত হোৱা এখন সভাত বিতৰ্কিত ধৰ্মীয় নেতা মৈলানা আৰ্শ্বাদ মাদানিয়ে নাগৰিকপঞ্জী উন্নীতকৰণ প্ৰক্ৰিয়াৰ ফলত অসমত ম্যানমাৰৰ ৰহিঙীয়াৰ ওপৰত হোৱা অত্যাচাৰৰ সদৃশ পৰিৱেশৰ সৃষ্টি হ’ব বুলি মন্তব্য কৰিছিল। সেইদৰে অসমতো কিছুমান ৰাজনৈতিকে নাগৰিকপঞ্জী উন্নীতকৰণ সম্পৰ্কত বিতৰ্কিত মন্তব্য সংবাদ মাধ্যমত প্ৰকাশ কৰি আহিছে। কিন্তু শেহতীয়াকৈ পশ্চিমবংগৰ মুখ্যমন্ত্ৰীয়ে অসমৰ নাগৰিকপঞ্জীৰ উন্নীতকৰণে অসমৰ পৰা ১ কোটি ২৫ লাখ বাংলাভাষী লোকক খেদি পঠিয়াব বুলি কৰা উদ্ভত মন্তব্যই সকলোৰে চকু কপালত তুলিছে। পশ্চিমবংগৰ আমোদপুৰত হোৱা এখন সভাত তেওঁ ৰাষ্ট্ৰীয় নাগৰিকপঞ্জী উন্নীতকৰণ কৰি জুইৰ লগত খেলা নকৰিবলৈ কেন্দ্ৰ আৰু অসমৰ ভাজপা নেতৃত্বাধীন চৰকাৰ সঁকীয়াই দিছে। তেওঁ অভিযোগ কৰিছেযে ৰাষ্ট্ৰীয় নাগৰিকপঞ্জীৰ উন্নীতকৰণৰ যোগেদি অসমৰ পৰা বাঙালী লোকসকলক জোৰ জুলুমকৈ খেদি পঠিয়াবলৈ চৰকাৰে ষড়যন্ত্ৰ কৰিছে। মমতা বেনাৰ্জীৰ এই ভাষণ ৰাজনৈতিক উদ্দেশ্যপ্ৰণোদিত হ’লেও এনে প্ৰৰোচনামূলক বক্তব্যই এতিয়ালৈ শান্তিপূৰ্ণ হৈ থকা নাগৰিকপঞ্জী উন্নয়ন প্ৰক্ৰিয়াটো বিঘ্নিত কৰিব পাৰে।

আইনসংগত ভাৱে চলি থকা নাগৰিকপঞ্জী উন্নয়নৰ লগত বাঙালী আবেগ মিহলি কৰি মমতা বেনাৰ্জীয়ে তেওঁৰ দলৰ সাংসদসকলক সংসদত অসমৰ ৰাষ্টীয় নাগৰিকপঞ্জী উন্নয়নৰ বিৰোধিতা কৰিবলৈ নিৰ্দেশ দিছে। অসমৰ বিদেশী সমস্যাটোৰ গুৰুত্ব কেতিয়াও উপলব্ধি নকৰা পশ্চিমবংগৰ মুখ্যমন্ত্ৰীৰ এই আষ্ফালনে ৰাষ্ট্ৰীয় নাগৰিকপঞ্জীৰ উন্নীতকৰণ প্ৰক্ৰিয়াটোক নেতিবাচকভাৱে প্ৰভাৱিত কৰিব পাৰে। প্ৰথম পৰ্যায়ৰ খছৰাক শান্তিপূৰ্ণভাৱে গ্ৰহণ কৰা অসমৰ সাধাৰণ জনতাৰ মাজত বিভাজন আনি বাঙালী জাতীয় আবেগ জাগ্ৰত কৰি মমতা বেনাৰ্জীয়ে হয়তো পশ্চিমবংগত তেওঁৰ ৰাজনৈতিক স্থিতি টনকিয়াল কৰিব খুজিছে। কিন্তু তেওঁৰ এনে কাৰ্যই ৰাজ্যখনৰ সাধাৰণ জনতাৰ মাহত অহেতুক ত্ৰাসৰ সৃষ্টি কৰি অশান্তিৰ সূত্ৰপাত কৰিব পাৰে আৰু নাগৰিকপঞ্জী উন্নয়ন প্ৰক্ৰিয়াটো বাধাগ্ৰস্থ হ’ব পাৰে।

ৰাষ্ট্ৰীয় নাগৰিকপঞ্জী উন্নীতকৰণৰ প্ৰথম পৰ্যায়ৰ খছৰা প্ৰকাশতে অসম চৰকাৰে স্বস্তিৰ নিশ্বাস পেলোৱাটো উচিত নহয়। বাকী থকা কামখিনিও সোনকালে শেষ কৰি এখন পূৰ্ণাংগ নাগৰিকপঞ্জী সোনকালে প্ৰস্তুত কৰি উলিওৱাৰ ওপৰত চৰকাৰে সৰ্বাধিক গুৰুত্ব দিব লাগে। নাগৰিকপঞ্জীৰ কাম অধিক বিলম্ব হ’লে প্ৰক্ৰিয়াটো বাধাগ্ৰস্থ কৰা অনেক শক্তিৰ আবিৰ্ভাৱ হ’ব। এনেবোৰ শক্তিৰ অহেতুক হস্তক্ষেপে সমগ্ৰ প্ৰক্ৰিয়াটো লাইনচ্যুত কৰিব পাৰে। অসমৰ ৰাষ্ট্ৰীয় নাগৰিকপঞ্জীৰ উন্নয়নক কেতিয়াও কোনো ব্যক্তি বা দলৰ ৰাজনৈতিক হাথিয়াৰ হ’বলৈ এৰি দিব নোৱাৰি।

পানীত বৰবিহ


নদ নদী, জান জুৰিৰে ভৰি থকা সুজলা সুফলা শস্য শ্যামলা অসমত খোৱাপানীৰ সমস্যা নাছিল বুলিবই পাৰি। খৰালি কালতো ভাৰতৰ বহুতো ৰাজ্যৰ দৰে অসমত খোৱা পানীৰ সংকট হোৱা দেখা নাযায়। প্ৰাক্তন প্ৰধানমন্ত্ৰী অটল বিহাৰী বাজপেয়ীয়ে পানীৰ অফুৰন্ত ভাণ্ডাৰ থকা উত্তৰ পূৰ্বাঞ্চলৰ নদীসমূহ উত্তৰ ভাৰতৰ নদীৰ লগত সংযোজিত কৰি উত্তৰ ভাৰতৰ খৰাং পীড়িত অঞ্চলসমূহলৈ পানী বোৱাই নিয়াৰ পৰিকল্পনা কৰিছিল। উত্তৰ পূৰ্বাঞ্চলৰ চিৰ প্ৰবাহিনী নদীসমূহৰ ওপৰত বান্ধ দি প্ৰচুৰ পৰিমাণে জলবিদ্যুৎ উত্পাদনৰ প্ৰক্ৰিয়াও আৰম্ভ হৈছে। ভাৰতৰ আন ৰাজ্যবোৰত পানীৰ অভাৱত সৃষ্টি হোৱা অভাৱনীয় পৰিস্থিতিৰ সময়ত অসমৰ মানুহে নিত্য ব্যৱহাৰ্য পানীৰ কাৰণে হাহাকাৰ কৰিবলগীয়া হোৱা নাই। আজিৰ সময়ত নগৰ-চহৰ সমূহত খোৱা পানীৰ সমস্যাই দেখা দিছে যদিও এতিয়াও পৰিস্থিতি নিয়ন্ত্ৰণৰ বাহিৰলৈ যোৱা নাই।

কিন্তু শেহতীয়াকৈ তেজপুৰ বিশ্ববিদ্যালয়ৰ এটা গৱেষকৰ দলে চলোৱা অধ্যয়নত গুৱাহাটীকে ধৰি অসমৰ বিভিন্ন স্থানৰ পানীত মাত্ৰাধিক পৰিমাণৰ বিষাক্ত ৰাসায়নিক পদাৰ্থৰ উপস্থিতি ধৰা পৰাটোৱে সাধাৰণ মানুহক উদ্বিগ্ন কৰি তুলিছে। গৱেষকৰ দলটোৱে প্ৰস্তুত কৰা প্ৰতিবেদনৰ মতে গুৱাহাটীৰ ১৬টা অঞ্চলৰ লগতে মধ্য অসমৰ নগাওঁ আৰু কাৰ্বি আংলঙকে ধৰি ১৮টা বৃহৎ অঞ্চলৰ পানীত মাত্ৰাধিক পৰিমাণৰ ফ্ল’ৰাইড ধৰা পৰিছে।  গুৱাহাটী মহানগৰীৰ বোন্দা, নাৰেংগী, বীৰকুছি, সাতগাওঁ, নুনমাটি হেঙেৰাবাৰী, সাতমাইল, বেলতলা, বশিষ্ট, খানাপাৰা আদি অঞ্চল আৰু নগাওঁ তথা কাৰ্বি আংলং জিলাৰ বিভিন্ন অঞ্চলৰ ভূ-গৰ্ভস্থ পানীত ১.৫১ ৰ পৰা .০০ পি পি এম পৰ্যন্ত ফ্ল’ৰাইড আছে, যিটো খোৱা পানীৰ বাবে গ্ৰহণযোগ্য ১.৫ পি পি এম পৰ্যন্ত ফৰাইডৰ পৰিমাণতকৈ অনেক বেছি সেইদৰে যোৰহাট, গোলাঘাট, মাজুলী, লখিমপুৰ, ধেমাজি, নলবাৰী, বাগছাকে ধৰি ১২ খন জিলাৰ ভূ-গৰ্ভৰ পানীত বিপদজনক মাত্ৰাত আৰ্ছেনিক থকা বুলি প্ৰমাণিত হৈছে এই বিষাক্ত পানী সেৱন কৰাৰ ফলত মানুহে কৰ্কটৰোগৰ দৰে দুৰাৰোগ্য ব্যাধিকে আদি কৰি বিভিন্ন শাৰীৰিক সমস্যাত ভূগিবলগীয়া হৈছে

জনসাধাৰণক বিশুদ্ধ খোৱাপানীৰ যোগান ধৰাটো চৰকাৰৰ মৌলিক কৰ্তব্য কিন্তু অসমত প্ৰাকৃতিক কাৰণত মানুহৰ পানীৰ অভাৱ সতকাই নোহোৱা বাবে এই বিষয়টোৱে যথোচিত গুৰুত্ব পোৱা নাই চৰকাৰী বিভাগে আৰম্ভ কৰা বহুতো পানীযোগান প্ৰকল্প হয় আধৰুৱা হৈ আছে নতুবা বিকল হৈ আছে এইবোৰ কাৰণতে খোৱা পানীকে ধৰি নিত্য ব্যৱহাৰ্য পানীৰ বাবে মানুহে কুঁৱা, দমকল আদিৰ ওপৰতে ভাৰসা কৰিবলগীয়া হয় আৰু ভূগৰ্ভৰ পানী ব্যৱহাৰ কৰিবলৈ বাধ্য হয় এতিয়া ভূ-গৰ্ভৰ পানীত মাত্ৰাধিক পৰিমাণৰ বিষাক্ত দ্ৰব্য পোৱাটো তেনে পানী সেৱন কৰা লোকৰ বাবে বাবে বিপদজনক হৈ পৰিছে


অলপতে ছিয়াং আৰু ব্ৰহ্মপুত্ৰৰ পানী ঘোলা হৈ পৰাটোৱে নদীৰ পানীৰ ওপৰতে নিৰ্ভৰশীল অসমৰ কৃষিজীৱি মানুহক যথেষ্ট আতংকিত কৰিছিল এতিয়া ভূ-গৰ্ভৰ পানীত বিষাক্ত ৰাসায়ণিক দ্ৰব্যৰ উপস্থিতিয়ে সাধাৰণ মানুহক অধিক বিপদত পেলাব চৰকাৰে সাধাৰণ মানুহক বিশুদ্ধ খোৱাপানী যোগান ধৰাৰ বিষয়টো গুৰুত্ব সহকাৰে লোৱাৰ প্ৰয়োজন আহি পৰিছে জনস্বাস্থ্য কাৰিকৰী বিভাগে ভূগৰ্ভৰ পানী বিষাক্ত হোৱা বুলি প্ৰমাণিত হোৱা অঞ্চলসমূহত অনতিপলমে বিশুদ্ধ পানীযোগানৰ ব্যৱস্থা কৰিব লাগে সেইবোৰ অঞ্চলত বিকল হৈ থকা পানীযোগান আঁচনিসমূহ পুনৰ সক্ৰিয় কৰাৰ লগতে বিষাক্ত পানীৰ পৰা সাধাৰণ মানুহক ৰক্ষা কৰাৰ আঁচনি লোৱাটো অতি জৰুৰী হৈ পৰিছে

Thursday, December 21, 2017

গ্ৰন্থ ব্যৱসায়ীৰ বিলৈ


ফৰাছী দাৰ্শনিক ভল্টেয়াৰে কৈছিল – কেৱল বৰ্বৰ জাতিৰ বাহিৰে সমগ্ৰ ভূমণ্ডলৰ সমগ্ৰ মানৱ জাতিৰ পৰিচালনা কৰে কিতাপে। এটা জাতিৰ বৌদ্ধিক উত্কৰ্ষৰ মাপকাঠীও সেই জাতিৰ কিতাপৰ প্ৰতি থকা মৰম আৰু ধাউতিৰ ওপৰত নিৰ্ভৰ কৰে। সেয়েহে যুগে যুগে কিতাপ পঢ়া আৰু লিখা এই দুয়োটা কামকে অতি গুৰুত্ব দি থকা হৈছে। কিতাপ প্ৰকাশৰ লগত জড়িত হৈ থাকে প্ৰকাশক আৰু গ্ৰন্থ বিক্ৰেতা সকল। পঢ়ুৱৈ সকলৰ কিতাপ পঢ়াৰ প্ৰতি থকা আগ্ৰহৰ ওপৰতে কিতাপৰ বিক্ৰী আৰু পৰোক্ষভাৱে প্ৰকাশকৰ ব্যৱসায়িক সফলতা বহু পৰিমাণে নিৰ্ভৰ কৰে। কিন্তু শেহতীয়াকৈ মানুহৰ মাজত কিতাপ পঢ়াৰ আগ্ৰহ কমি অহাৰ কথা জানিব পৰা গৈছে। মানুহৰ ছপা কিতাপৰ প্ৰতি ধাউতি কমি অহাটোৱে বিশ্বজুৰি কিতাপৰ ব্যৱসায়ত প্ৰতিকূল প্ৰভাৱ পেলাইছে। তদুপৰি চৰকাৰৰ কিছুমান সিদ্ধান্তই গ্ৰন্থ প্ৰকাশক আৰু বিক্ৰেতাসকলক সময়ে সময়ে বিপাঙত পেলায়।
উল্লেখ্যযে অসমৰ যিকেইটা মুষ্টিমেয় ব্যৱসায়ত এতিয়াও অসমীয়াৰ আধিপত্য আছে, সেইবিলাকৰ ভিতৰত গ্ৰন্থ ব্যৱসায় অন্যতম। কিন্তু ৰাজ্য চৰকাৰে বিদ্যালয়ৰ উচ্চ শ্ৰেণীৰ ছাত্ৰ ছাত্ৰীক বিনামূলীয়াকৈ পাঠ্য পুথি যোগাৰ দিয়াৰ সিদ্ধান্তই গ্ৰন্থ উদ্যোগটোৰ লগত জড়িত হৈ থকা লোকসকলক চিন্তিত কৰিছে। অপ্ৰিয় হ’লেও সত্যযে অসমত এতিয়া আটাইতকৈ বেছি বিক্ৰী হোৱা কিতাপ গ’ল পাঠ্যপুথি। সৰু বৰ সকলো কিতাপৰ দোকানৰ ব্যৱসায় পাঠ্যপুথি বিক্ৰীৰ ওপৰতে নিৰ্ভৰশীল হৈ আছে। পাঠ্যপুথি বিচাৰি যোৱা গ্ৰাহকৰ চকুত পৰা বাবেই কিতাপৰ দোকানত সহায়িকা পুথি, গল্প কবিতা, উপন্যাসৰ কিতাপো বিক্ৰী হয়। তেনেস্থলত পাঠ্যপুথি বিনামূলীয়াকৈ বিতৰণ কৰিবলৈ চৰকাৰে লোৱা হঠকাৰী সিদ্ধান্তই এই ব্যৱসায়ৰ প্ৰতি অশনি সংকেট কঢ়িয়াই আনিছে।
চৰকাৰৰ সিদ্ধান্তৰ বিৰোধিতা কৰি গ্ৰন্থ প্ৰকাশক আৰু বিক্ৰেতা সন্থাই আন্দোলনমুখী হৈছে। তেওঁলোকে প্ৰতিবাদকল্পে ২০ ডিছেম্বৰৰ পৰা ব্যৱসায়ীসকলে কিতাপৰ দোকানসমূহ বন্ধ কৰি ৰাখিছে। কিন্তু তাত্পৰ্যপূৰ্ণভাৱে ৰাজ্যৰ শিক্ষামন্ত্ৰীয়ে এই আন্দোলনটোক কোনো গুৰুত্ব নিদি আন্দোলনকাৰী সকলক আৰু দুদিনলৈ কাৰ্যসূচী বঢ়াই দিব পাৰে বুলি কটাক্ষ কৰিছে। কোনোবা ব্যৱসায়ীৰ উপকাৰৰ বাবে চৰকাৰৰ সিদ্ধান্তৰ কোনো পৰিৱৰ্তন কৰা নহয় বুলি তেওঁ সদম্ভে ঘোষণা কৰিছে।
সমগ্ৰ বিশ্বজুৰি গ্ৰন্থ ব্যৱসায়ে মন্দাৱস্থাৰ সন্মুখীন হৈছে। মোবাইল ফোন, টেলিভিছন আদিয়ে মানুহৰ কিতাপ পঢ়া সময় কাঢ়ি লোৱাৰ ফলত কিতাপ পঢ়া মানুহৰ সংখ্যা দ্ৰুতগতিত হ্ৰাস পাইছে। তদুপৰি অনলাইন বিপনীবোৰে নানান ৰেহায় ঘোষণা কৰি কিতাপ পঢ়ি ভাল পোৱা গ্ৰাহকক আকৰ্ষিত কৰিছে। এনেবোৰ কাৰণতে থলুৱা অসমীয়া মানুহে কৰি থকা এই ব্যৱসায়ৰো মুদা মৰাৰ পূৰ্ণ সম্ভাৱনা আছে। তেনে পৰিস্থিতিত ভূতৰ ওপৰত দানহ পৰাদি চৰকাৰে পাঠ্যপুথিৰ বিক্ৰীও বিক্ৰেতাসকলৰ পৰা কাঢ়ি ল’ব খোজা কাৰ্যই সকলোকে স্তম্ভিত কৰিছে।

মন কৰিবলগীয়া কথাযে, কেন্দ্ৰীয় মাধ্যমিক শিক্ষা পৰিষদৰ অনুমোদিত পাঠ্যপুথি, জৱাহৰ নবোদয় বিদ্যালয়ৰ উচ্চ শ্ৰেণীৰ পাঠ্যপুথিও এতিয়ালৈকে বিনামূলীয়াকৈ দিয়াৰ কোনো আঁচনি নাই। তেনে পৰিস্থিতিত চৰকাৰে সম্পূৰ্ণ বিনামূলীয়া নকৰি পাঠ্যপুথিৰ মুঠ মূল্যৰ এটা অংশলৈ ৰাজ সাহাৰ্য প্ৰদান কৰি কিতাপৰ দোকানত পাঠ্যপুথি কম দামত পোৱাৰ ব্যৱস্থা কৰাহে উচিত। এনেয়ো যাচি দিয়া সোণৰো মূল্য নাই বুলি কোৱা হয়। তদুপৰি পাঠ্যপুথিৰ ছপা আৰু বিতৰণ ব্যৱস্থাটো নিকা আৰু পাৰদৰ্শী নহ’লে ছাত্ৰ ছাত্ৰীয়ে কিতাপ সময়মতে নোপোৱাৰ উপৰিও ব্যাপক দুৰ্নীতি হোৱাৰ সম্ভাৱনা আছে। সেয়েহে চৰকাৰে সমাজৰ বৃহত্তৰ স্বাৰ্থৰ বাবে বিনামূলীয়া পাঠ্যপুথি বিতৰণৰ সিদ্ধান্তটো চালি জাৰি চাই পুনৰ বিবেচনা কৰাৰ প্ৰয়োজন আছে।

Saturday, December 16, 2017

বিত্তীয় সংকল্প আৰু জমাধন বীমা বিধেয়ক, ২০১৭




আজি ১৫ ডিছেম্বৰৰ পৰা আৰম্ভ হোৱা সংসদৰ শীতকালিন অধিৱেশনত উত্থাপিত হ’বলগীয়া যিকেইখন বিধেয়কে সকলোৰে দৃষ্টি আকৰ্ষণ কৰিছে তাৰ ভিতৰত অন্যতম হ’ল Financial Resolution and Deposit Insurance bill 2017  চমুকৈ FRDI বিধেয়ক। অসমীয়াত ভাঙণি কৰিলে হ’বগৈ বিত্তীয় সংকল্প আৰু জমা বীমা বিধেয়ক। যোৱা আগষ্ট মাহতে এই বিধেয়কখন সদনত উপস্থাপন কৰা হৈছিল আৰু তাৰ পাছতে যুটীয়া সংসদীয় সমিতিলৈ পৰীক্ষণৰ বাবে পঠোৱা হয়। এইবাৰৰ শীতকালিন অধিৱেশনতে যুটীয়া সংসদীয় সমিতিয়ে প্ৰতিবেদন দাখিল কৰিব আৰু তাৰ পাছতে এই বিধেয়কখন আইনত পৰিণত হোৱাৰ সম্ভাৱনা আছে। 

আজি কিছুদিন ধৰি FRDI  বিধেয়কখনৰ বিষয়ে সংবাদ পত্ৰ, টেলিভিছন চেনেল, ছ’ছিয়েল মেডিয়া আদিত ব্য়াপক চৰ্চা হৈছে। চৰকাৰে ধাৰত ডুবিবলৈ ধৰা আৰু দেউলীয়া হোৱা বিত্তীয় প্ৰতিস্থানসমূহক ৰক্ষা কৰিবলৈ এই প্ৰতিস্থানসমূহত জমা থকা সাধাৰণ জমাকৰ্তাৰ ধন ব্যৱহাৰ কৰিব বুলি প্ৰচাৰ হৈছে। কিন্তু বিত্তমন্ত্ৰী অৰুণ জেটলীৰ ভাষ্য অনুসৰি এই আইনখনৰ জৰিয়তে বিত্তীয় প্ৰতিস্থানসমূহক এক নিৰীক্ষণ ব্যৱস্থাৰ মাজলৈ অনাৰ লগতে দেউলীয়া হোৱা বিত্তীয় প্ৰতিস্থানত বিপৰ্যস্ত হোৱা সাধাৰণ মানুহৰ জমাধনৰ সুৰক্ষাৰ ব্যৱস্থা হ’ব। 

কোৱা বাহুল্যযে, আমাৰ দেশত বেংকিং ব্যৱস্থাৰ প্ৰতি মানুহৰ বিশ্বাস এতিয়াও সুপ্ৰতিস্থিত হোৱা নাই। প্ৰধানমন্ত্ৰীৰ বিনামূলীয়াকৈ একাউণ্ট খোলাৰ সুবিধা থকা জন ধন যোজনায়ো প্ৰথমতে লাভ কৰা গতি অক্ষুন্ন ৰাখিব পৰা নাই। এতিয়াও দেশৰ দুখীয়া আৰু পিছপৰা বহুতো মানুহক বেংকিং ব্যৱস্থাই ঢুকি পোৱা নাই। তেনে পৰিস্থিতিত বেংক বা বিত্তীয় প্ৰতিস্থানত জমা ৰখা সাধাৰণ মানুহৰ ধন নতুন আইনখনৰ জৰিয়তে চৰকাৰে জব্দ কৰাৰ অধিকাৰ লাভ কৰিব বুলি চলা প্ৰচাৰে মানুহক শংকিত কৰিছে। বিমুদ্ৰাকৰণৰ যোগেদি মানুহৰ হাতৰ নগদ ধন নাইকীয়া কৰাৰ দৰে মোদী চৰকাৰে এইবাৰ বেংকৰ ধনো নাইকীয়া কৰাৰ পাং পাতিছে বুলি সমালোচনাও হৈছে।

এই কথা কেতিয়াও বিশ্বাসযোগ্য নহয়যে এখন গণতান্ত্ৰিক দেশৰ চৰকাৰে এনে হঠকাৰী সিদ্ধান্ত ল’ব পাৰিব। সেয়া যিয়েই নহওক কিয়, চৰকাৰে প্ৰনয়ণ কৰিবলৈ লোৱা এই নতুন আইনখনৰ বিষয়ে এতিয়াও সাধাৰণ মানুহৰ মাজত যথেষ্ট দ্বিধা আৰু সংশয় বিৰাজমান হৈ আছে। আচলতে এই আইনখনৰ জৰিয়তে বেংক, বীমা কোম্পানী আদি কোনো বিত্তীয় প্ৰতিস্থান যাতে দেউলীয়া হ’বলগীয়া নহয়, তাৰে ব্যৱস্থা কৰা হ’ব। বিত্তীয় প্ৰতিস্থানসমূহৰ কামকাজ আৰু গতিবিধিৰ ওপৰত নজৰ ৰাখিবলৈ এটা সুকীয়া নিৰীক্ষণ ব্যৱস্থা তৈয়াৰ কৰা হ’ব যাতে বিত্তীয় প্ৰতিস্থানসমূহে দেউলীয়া হ’বলৈ গতি কৰাৰ সময়তে উপযুক্ত ব্যৱস্থা লৈ সেইবিলাকক সঠিক পথলৈ ঘূৰাই আনিব পৰা যায়। এতিয়ালৈ বলবৎ থকা আইনী ব্যৱস্থা অনুসৰি কোনো বিত্তীয় প্ৰতিস্থান দেউলীয়া হ’লে জমাকৰ্তাই জমাধনৰ মাথোন  ১ লাখ টকাহে ঘূৰাই পায়। অৰ্থাৎ বৰ্তমান পৰিস্থিতিতো দেউলীয়া হোৱা বিত্তীয় প্ৰতিস্থানত জমা ৰখা জমাকৰ্তাৰ সমস্ত ধন পানীত পৰে। FRDI  বিধেয়কখনত থকা ব্যৱস্থা অনুসৰি কোনো প্ৰতিস্থান দেউলীয়া হ’বলৈ গতি কৰা বুলি পূৰ্বানুমান পালে সেই প্ৰতিস্থানত জমা থকা ধন ব্যৱহাৰ কৰি হ’লেও প্ৰতিস্থানটোক দেউলীয়া হোৱাৰ পৰা ৰক্ষা কৰা হ’ব। বিত্তমন্ত্ৰীয়ে সাবী কৰিছেযে এই ব্য়ৱস্থাৰ জৰিয়তে বিত্তীয় প্ৰতিস্থানসমূহক জীয়াই ৰখাৰ লগতে সাধাৰণ মানুহৰ জমাধন অধিক সুৰক্ষিত কৰিব পৰা যাব।

অসমৰ মানুহৰ বিত্তীয় চেতনা ভাৰতৰ আন বহুকেইখন ৰাজ্যৰ তুলনাত কম। সেয়েহে বেংকৰ জমাধন নাইকীয়া হ’ব বুলি চলা উৰাবাতৰিয়ে কিছুসংখ্যক মানুহক প্ৰভাৱিত কৰিব পাৰে। কিন্তু এই কথা ঠিকযে চৰকাৰে এই নতুন ব্যৱস্থাৰ জৰিয়তে বিত্তীয় প্ৰতিস্থানসমূহক কিছু পৰিমাণে নিয়ন্ত্ৰণলৈ আনিবলৈ সক্ষম হ’ব। বিত্তীয় প্ৰতিস্থানসমূহ সুৰক্ষি হ’লে জনতাৰ জমাধনো আপোনা আপুনি সুৰক্ষিত হ’ব।  
   

ব্ৰহ্মপুত্ৰৰ অসুখ




মহাবাহু ব্ৰহ্মপুত্ৰ অসমৰ জীৱনৰেখা। যুগে যুগে ব্ৰহ্মপুত্ৰৰ পানীয়ে অসমভূমিক সুজলা সুফলা কৰি ৰাখিছে। লুইতৰ পানীয়ে অসমৰ চহৰে নগৰে, গাঁৱে ভূঞে প্লাৱনৰ জোৱাৰ আনি উৰ্বৰ শস্য শ্যামলা কৰাৰ উপৰিও মানুহ আৰু জীৱজন্তুৰ বাবে প্ৰয়োজনীয় খোৱাপানীৰ যোগান ধৰি আহিছে। কিন্তু শেহতীয়াকৈ ব্ৰহ্মপুত্ৰৰ পানী ঘোলা আৰু বিষাক্ত হোৱাৰ খবৰে সাধাৰণ মানুহক আতংকিত কৰি তুলিছে। তিব্বতত য়াৰ্লুং চাংপো নামেৰে প্ৰবাহিত হৈ অৰুণাচলত ছিয়াং নামেৰে পৰিচিত নদীখনৰ পানী হঠাতে বোকাময় হৈ পৰিছে। ছিয়াঙৰ বোকাময় পানী ভৈয়ামলৈ আহি লুইতৰ পানী ঘোলা কৰিছে। তেজপুৰস্থিত প্ৰতিৰক্ষা গৱেষণাগাৰ বা ডি আৰ এলৰ তথ্য অনুসৰি শেহতীয়াকৈ ব্ৰহ্মপুত্ৰৰ পানীৰ বোকাময়তা  (Turbudity) সাধাৰণতে  হিচাপতকৈ ১৫০ গুণে বৃদ্ধি পাইছে। সংখ্যাত কবলৈ হ’লে, মানুহে পান কৰিব পৰা পানীৰ সৰ্বোচ্চ বোকাময়তা হ’ল পাঁচ এন টি ইউ (নেফেল’মেট্ৰিক টাৰ্বিডিটি ইউনিট) আৰু ব্ৰহ্মপুত্ৰৰ সাধাৰণ বোকাময়তা পঞ্চাশ এন টি ইউ। কিন্তু জোখ মাখ কৰা সময়ত ব্ৰহ্মপুত্ৰৰ পানীৰ বোকাময়তা ৭৫০ এন টি ইউ পোৱা গৈছে। এইদৰে ঘোলা হোৱা নদীৰ পানী মানুহ, পশু পক্ষী, উদ্ভিদ, সকলোৰে বাবে বিপদজনক হৈ পৰিছে।

কিন্তু আচৰিত কথাযে, ব্ৰহ্মপুত্ৰৰ পানী অস্বাভাৱিকভাৱে ঘোলা হৈ পৰাটোৱে সাধাৰণ মানুহক আতংকিত কৰিছে যদিও চৰকাৰ, প্ৰশাসনে বিশেষ গুৰুত্ব দিয়াটো পৰিলক্ষিত হোৱা নাই। এই অদ্ভূত প্ৰাকৃতিক পৰিঘটনাৰ বিষয়ে অনুসন্ধান কৰা হ’ব বুলি চৰকাৰে ঘোষণা কৰিছে যদিও সাধাৰণ মানুহ আশ্বস্ত হ’ব পৰা নাই। আচৰিত হ’বলগীয়াযে ব্ৰহ্মপুত্ৰৰ এই বিপৰ্যয়ৰ সময়তো ৰাজ্য চৰকাৰখনৰ বিশেষ তত্পৰতা চকুত পৰা নাই। কেন্দ্ৰীয় গৃহ ৰাজ্যমন্ত্ৰী কিৰেন ৰিজিজুৱে এই ঘটনা অতিৰঞ্জিত প্ৰচাৰবুলি আখ্যা দিবলৈ যত্নপৰ হোৱা দেখা গৈছে। কেন্দ্ৰীয় চৰকাৰে তিব্বতত হোৱা ভূমিকম্পৰ কাৰণেই ব্ৰহ্মপুত্ৰৰ পানী ঘোলা হোৱা বুলি কৈ দায়িত্ব সাৰিছে। কিন্তু ইয়াৰ বিপৰীতে অৰুণাচলৰ মন্ত্ৰী বিধায়কসকলে একত্ৰিত হৈ এই বিষয়ত প্ৰধান মন্ত্ৰীলৈ পত্ৰ প্ৰেৰণ কৰি কেন্দ্ৰীয় চৰকাৰৰ দৃষ্টি আকৰ্ষণ কৰিবলৈ শলাগিবলগীয়া প্ৰয়াস কৰিছে।

‘নমামি ব্ৰহ্মপুত্ৰ’ উত্সৱৰ জৰিয়তে ধুম ধামেৰে ব্ৰহ্মপুত্ৰত পূজা অৰ্চনা কৰা চৰকাৰখনে ব্ৰহ্মপুত্ৰৰ অসুখৰ সময়ত গুৰুত্ব নিদিয়াটো অতি পৰিতাপৰ কথা। ব্ৰহ্মপুত্ৰ অসুখীয়া হ’লে সমগ্ৰ অসম উপত্যকাৰ জীৱকূল চৰম বিপৰ্যয়ৰ সন্মুখীন হ’ব। সেয়েহে নদীৰ পানী ঘোলা হোৱা এই ঘটনাটোৰ সঠিক বৈজ্ঞানিক অনুসন্ধান হোৱাটো বাঞ্ছনীয়। নদীৰ পানীত চিমেণ্ট মিহলি হৈ পানী ঘোলা কৰা বুলি বাতৰি প্ৰচাৰ হৈছিল যদিও প্ৰতিৰক্ষা গৱেষনাগাৰৰ পৰীক্ষাত সেয়া চিমেণ্ট বহয় বুলি জানিব পৰা গৈছে। বৰং পানীত অত্যাধিক খনিজ পদাৰ্থৰ উপস্থিতি ধৰা পৰিছে। কিন্তু এতিয়াও পানী ঘোলা হোৱাৰ কাৰণ ঠিৰাংকৈ জানিব পৰা হোৱা নাই। ব্ৰহ্মপুত্ৰৰ এই অসুখ চীনে তিব্বতত সুৰংগ খান্দি য়াৰ্লুং চাংপোৰ গতি সলনি কৰাৰ প্ৰয়াসৰ পৰিণতি বুলিও সন্দেহ কৰা হৈছে। সেইদৰে চীনে নদীখনৰ উজনি অংশত বৃহৎ নদীবান্ধ নিৰ্মাণ কৰাৰ বাবেই পানী ঘোলা হোৱা বুলিও অনুমান কৰা হৈছে। সেয়া যিয়েই নহওক, বিজ্ঞানসন্মত গৱেষণাৰে ব্ৰহ্মপুত্ৰৰ এই অসুখৰ কাৰণ জানিবই লাগিব আৰু নিৰাময়ৰ ব্যৱস্থা কৰিবই লাগিব। কেৱল অনুমানৰ ভিত্তিত কাৰণ ফঁহিয়াই থাকিলে অসুখীয়া ব্ৰহ্মপুত্ৰই এসময়ত সকলোৰে বাবে বিপৰ্যয়ৰ সৃষ্টি কৰিব। গংগাৰ পানী এইদৰে হঠাতে ঘোলা হৈ পৰিলে ঘটনাটোৱে যিদৰে গুৰুত্ব পালেহেতেন, তাৰ তুলনাত ব্ৰহ্মপুত্ৰৰ পানী ঘোলা হোৱাটোৱে যথোচিত গুৰুত্ব নোপোৱা বুলি সাধাৰণ মানুহে অনুভৱ কৰিছে।

সাৱধানতাই নিৰাময়ৰ উপায়




আজি বিশ্ব এইডছ দিৱস। ১৯৮৮ চনৰ পৰা প্ৰতি বছৰে ১ ডিছেম্বৰৰ দিনটো বিশ্ব এইডছ দিৱস হিছাপে পালন কৰা হৈ আহিছে। যিকেইটা মাৰাত্মক ব্যাধিয়ে মানুহৰ জীৱনৰ প্ৰতি সদায় প্ৰত্যাহ্বান কঢ়িয়াই আনিছে, তাৰে অন্যতম হ’ল এইডছ। মানুহৰ পৰা মানুহলৈ তেজ, লেলাৱতি, শুক্ৰাণু আদি শাৰীৰিক তৰলেৰে সংক্ৰমিত হোৱা এইবিধ মহাব্যাধিৰ পৰা পৰিত্ৰাণৰ উপায় এতিয়ালৈ ওলোৱা নাই। সাৱধানতাই এতিয়ালৈ এইডছৰ পৰা ৰক্ষা পোৱাৰ একমাত্ৰ উপায় হিছাপে পৰিগণিত হৈ আছে। সেয়েহে এইডছ ৰোগৰ বিষয়ে সাধাৰণ মানুহৰ মাজত সজাগতা সৃষ্টি আৰু এই ৰোগত আক্ৰান্ত ৰোগীসকলৰ প্ৰতি সহমৰ্মিতা প্ৰদৰ্শন কৰাই হৈছে এইডছ দিৱস পালনৰ মুখ্য উদ্দেশ্য। ২০১৩ চনৰ তথ্য অনুসৰি বৰ্তমান বিশ্বত ৩৫ নিযুত এইডছ ৰোগী আছে আৰু ইতিমধ্যে ৩৬ নিযুত এইডছ ৰোগীৰ মৃত্যু হৈছে।

মন কৰিবলগীয়াযে, HIV  নামৰ এবিধ বীজাণু শৰীৰত প্ৰৱেশ কৰাৰ বাবেই এইডছ ৰোগ হয়। HIV  বীজাণু শৰীৰত থকা লোক সকলক  HIV  পজিটিভ ব্যক্তি বোলা হয়। কিন্তু HIV বীজাণু শৰীৰত থকা মানেই এইডছ আক্ৰান্ত নহয়। বৰ্তমান সময়ত চিকিত্সা বিজ্ঞানৰ সহায়ত কিছু সাৱধানতা অৱলম্বনৰ জৰিয়তে HIV পজিটিভ ব্যক্তিসকলে এইডছ নোহোৱাকৈ বহু বছৰ জীয়াই থকাটো সম্ভৱ হৈ উঠিছে। আজি কিছুবছৰ আগলৈ এইডছ আক্ৰান্ত বা HIV পজিটিভ ব্যক্তিৰ প্ৰতি থকা সামাজিক দৃষ্টিভংগীৰো যথেষ্ট পৰিৱৰ্তন হৈছে। এতিয়া HIV বীজাণু কঢ়িয়াই লৈ ফুৰা ব্যক্তিয়ে নিজকে HIV  পজিটিভ বুলি ঘোষণা কৰি স্বাভাৱিক জীৱন যাপন কৰিব পৰা হৈছে। অসমৰ জাহ্নৱী গোস্বামী নিজকে HIV  পজিটিভ বুলি ঘোষণা কৰা উত্তৰ পূৰ্বাঞ্চলৰ প্ৰথমগৰাকী ব্যক্তি। তেওঁ HIV  পজিটিভ হৈয়ো বহু বছৰ ধৰি বিভিন্ন সামাজিক কাম কাজৰ লগত জড়িত হৈ আছে। তদুপৰি Assam Network of Positive People নামৰ HIV পজিটিভ লোকসকলক সহায় কৰা বেচৰকাৰী সংস্থা এটাৰো তেওঁ প্ৰতিস্থাপক। তেওঁৰ দৰে সমগ্ৰ বিশ্বতে বহুতো ব্যক্তিয়ে HIV পজিটিভ ব্যক্তিয়ে সাধাৰণ জীৱন যাপন কৰি আছে।

ভাৰতৰ ৰাজ্যসমূহৰ ভিতৰত অসমত এইডছ ৰোগৰ প্ৰাদুৰ্ভাৱ কম। ২০১৫ চনৰ তথ্য অনুসৰি অসমত ১২,০৯০ জন HIV পজিটিভ আৰু এইডছ আক্ৰান্ত লোক আছে। কিন্তু অসমতো এইডছ ৰোগীৰ সংখ্যা ক্ৰমাৎ বৃদ্ধি পাই আহিছে। HIV Sentinel Surveillances ৰ তথ্য অনুসৰি অসমত এইডছ সৰ্বাধিক সমকামী পুৰুষৰ দ্বাৰা বিয়পিছে। তাৰ পাছতেই মহিলা যৌনকৰ্মী আৰু বেজীৰে ড্ৰাগছ সেৱন কৰা ব্যক্তিৰ দ্বাৰা এই ৰোগ বিয়পিছে। অধ্যয়নৰ পৰা জানিব পৰা গৈছেযে, দূৰ দুৰণিৰ পৰা অহা ট্ৰাকচালক আৰু বিভিন্ন চহৰত কাম কৰা অকলশৰীয়া পুৰুষৰ জৰিয়তে এইডছৰ বীজাণু এখন ৰাজ্যৰ পৰা আন এখন ৰাজ্যলৈ বিয়পি পৰিছে। উত্তৰ পূৰ্বাঞ্চলৰ দুৱাৰমুখস্বৰূপ হোৱাৰ বাবে অসমত আন ৰাজ্যৰ ব্যক্তিৰ দ্বাৰা এইডছৰ সংক্ৰমণ হোৱাৰ সম্ভাৱনা অধিক।  উল্লেখ্যযে উত্তৰ পূৰ্বাঞ্চলৰ ভিতৰত মণিপুৰ সৰ্বাধিক এইডছ আক্ৰান্ত ৰাজ্য। মণিপুৰৰ পাছতে আছে মিজোৰাম আৰু নাগালেণ্ড। এই পাৰ্বত্য ৰাজ্যসমূহত মূলত: বেজীৰ জৰিয়তে ড্ৰাগছ লোৱাৰ প্ৰৱণতাৰ বাবে এইডছৰ সংক্ৰমণ ভয়াবহ হৈ পৰিছে। মন কৰিবলগীয়াযে অসমৰ ভিতৰত গুৱাহাটী মহানগৰ আৱৰি থকা কামৰূপ মহানগৰ জিলাতেই এইডছ ৰোগীৰ সংখ্যা আটাইতকৈ বেছি।

উত্তৰ পূৰ্বাঞ্চলৰ অৰ্থনৈতিক প্ৰগতিৰ বাবে চৰকাৰে ৰাজ্যসমূহৰ মাজত যোগাযোগ উন্নীত কৰাৰ আঁচনি হাতত লৈছে। মনকৰিবলগীয়াযে যোগাযোগ বৃদ্ধিয়ে অসমৰ বাবে এইডছৰ ৰূপত নতুন বিপদৰ আমদানি হোৱাৰো সম্ভাৱনা বৃদ্ধি কৰিছে। সেয়েহে এইডছৰ দৰে মাৰাত্মক ৰোগৰ বিষয়ে অসমত অধিক সজাগতা সৃষ্টিৰ প্ৰয়োজন আছে। কিছু সাৱধানতা অৱলম্বন কৰিলেইযে এইডছ মহাব্যাধিৰ পৰা হাত সাৰিব পাৰি, এই বিষয়ে সাধাৰণ মানুহক সচেতন কৰিব পৰাৰ ওপৰতে বিশ্ব এইডছ দিৱসৰ সফলতা নিৰ্ভৰ কৰে।